لكْتَاب ن سِيدْنَا مَتَّى

ؤُهَاذ سُّوْرَا ن سِيدْنَا مَتَّى زݣ لْإِنْجِيل ن سِيدِيْنغ عِيْسَى لْمَسِيح. نتَّا يدْجن زݣ لمْحَضْرَا نّس لُّوْلِـيِين. لكْتَاب-أَذ يتْتَرْجم س تْمَازِيغْت ن غُمَارَا يعْنِي يدْجن لُّغَا ن لْمغْرب (تَغُوْمَارِيت). لكْتَاب-أَذ ن سِيدْنَا مَتَّى نتَّا سُّوْرَا لُّوْلِيَا ݣِي لْإِنْجِيل. سِيدْنَا مَتَّى اَݣِيل يسّن سِيدِينغ عِيْسَى س إِغْفل نّس، ئِتْسَفَر إِيْذس اَمْڬَا اَي يتْبشَّر.

هَامْڬَا يقّر لكْتَاب ن سِيدْنَا مَرْقُس ݣِي 7: 24-27، "كُلْشِي ؤُهن أَ يْتسْلَان إِ لْهدْرَا ئِنُو أَ خْدم ݣَاس، نتَّا غَايَام يَان ن بْنَادم مْحرَّب ئِبْنَا أَخْيَام نّس خ ؤُژْرُو. ئِوّث أَنْژار، حملن ئِمُوْرَّاس، ئِصَّاط رّْوَاح جُوهْدِي ئِذْرَا خ ؤُخْيَام أَهن. وَاخَّا هَامْڬَان مَا يَا حْصل شِي أَزَال تبْنَا خ لْسَاس ن ؤُژْرْو.  كُلْشِي ؤُهن أَ يْتسْلَان إِ لْهدْرَا ئِنُو مَا ٱه خدّم شِي ݣَاس، نتَّا غَايَام يَان مْجمْجم ئِبْنَا أَخْيَام نّس خ رْمل.  ئِوّث أَنْژَار، حمْلن ئِمُوْرَّاس، ئِصَاط رّْوَاح جُوهْدِي ئِذْرَا خَ ؤُخْيَام أَهن. ݣِي لْوقْت أَهن تحْصل، تقِّيم لْخَرْبَا."

عَاود يقّر ݣِي سُّوْرَا ن سِيدْنَا مَرْقُس ݣِي 25: 31-34 إِي 41، "زْݣَاي شَا د ئِدُّو أَعِيَّال ن بْنَادم س لْعَضَمَا نّس، إِيْذس كُلْشِي لْمَلَائِكَاث، دَا قِّيم خف لْعَرْش نّس ن لْعَضَمَا. دَا نْجمْعُو كُلْشِي مدّن ݣُوم نّس، دَا خْطَار مدّن يَان زݣ وَايط أَمْڬَا غَايَام ؤُهن أَلَّا ئِڬسِّي لبْهَايم ئِخطَّار ئِبرِّين زݣ تِغَاطن.  ئِبرِّين دَان ئِسْكر خف لِيمن، تِغَاطن دَان ئِسْكر خف شْمَال. سَعَاك ؤُهِين أَ يلَّان خف لِيمن دَاسن ئِنْ لْمَلِڬ-اَذ: آي ؤُهِين أَ ئِسْكر ݣَاسن بَابَا لْبَرَكَا، هَالَاو كُونَّا ورْثَاوْت لْمُلْك اَلَّا ئِوجّد-اَون زْݣَا هڬْتِيل دُّنْيَا... سَعَاك ؤُهِين أَ يلَّان خف شْمَال دَاسن إِن لْمَلِڬ: آي ؤُهِين أَلَّا ينْعَان ربِّي بعّْدَاوْث خْفِي! أَنْدَاوْث دَار لْعَافْيَا أَلَّا مَا هْنسَّا شِي عُمّْرَا، أَلَّا تْوجَّدن إِ شِّيطَان إِ شَّيَاطِين نّس!"